axinita

Borosilicato de aluminio e calcio con cantidades variables de ferro, magnesio e manganeso, de fórmula (Ca,Mn,Fe)3Al2BO3Si4O12(OH). Cristaliza no sistema triclínico e os cristais son tabulares. É piroeléctrico, de cor marrón, gris ou violáceo, transparente e de brillo vítreo. Ten exfoliación clara, dureza 6,5-7 e peso específico 3,26-3,36. A súa orixe é pneumatolítica, nas áreas de contacto de rochas ígneas.