Azevedo Filho, Leodegário Amarante de

Profesor universitario e crítico. Destacado investigador no mundo da Filoloxía, da Lingüística e da Crítica Literaria. Profesor da Universidade do Estado de Rio de Janeiro e da Universidade Federal -en calidade de docente de Literatura Portuguesa e Brasileira-, acudiu como profesor visitante a algunhas universidades de prestixio, como as de Colonia (1968) e Coimbra (1972).

O seu campo de estudo é moi amplo, tanto en temas (lingua, literatura, crítica literaria) como en épocas (desde a Idade Media ata o Modernismo). Como libros ten publicadas máis de cincuenta obras, así como outros moitos estudos que viron a luz en revistas especializadas ou numerosos artigos publicados nas actas dos congresos nos que interviu. De toda a súa produción destacan, entre outros, libros dedicados á figura de Camões -autor no que está especializado- (O cânone Lírico de Camões, 1976), outros que teñen como obxecto de estudo a obra e a figura de Anchieta e poetas do Modernismo brasileiro, traballos de crítica literaria como a Introdução ao Estudo da nova crítica no Brasil (1965) ou Estruturalismo e Crítica de Poesía (1970), traballos centrados no estudo da lingua portuguesa (Para uma Gramática Estrutural da Lingua Portuguesa, 1971). Especial mención merecen os traballos que dan conta da súa preocupación pola lingua galega e a primitiva lírica galego-portuguesa; nestes campos destacan a súa edición crítica As cantigas de Pero Meogo (1974) e os seguintes artigos: “A narrativa de símbolos na lírica de Pero Meogo” (1989), “Para uma leitura simbólica das cantigas de Pero Meogo” (1995), “O poema musical de Codax como narrativa” (1996), “O Conflito lingüístico da Galiza” (1981), “Fonología da língua galega: breve anotação em confronto com o português” (1986) e “O galego entre o português e o castelhano” (1992).

Cronología