batalla

1. s f [BÉL]

   Acción na que dous exércitos inimigos se baten un contra o outro e que, segundo a súa envergadura, pode chegar a decidir o resultado dunha guerra. Durante a batalla os exércitos coordinan a súa capacidade de movemento, de ataque, de loxística, etc, co fin de acadar os resultados desexados. Se ben o concepto de batalla non ten mudado esencialmente no transcurso da historia, si o fixeron dabondo a contía dos elementos e as dimensións dos teatros de operacións. Así, de frontes reducidas, con armas de curto alcance e de mando directo no mesmo campo de batalla polo xeneral en xefe, pasouse a frontes de batalla de bastantes quilómetros dende a Segunda Guerra Mundial. Amais diso conseguiuse o equilibrio entre o fogo e o movemento, como resultado da mecanización dos avións, dos foguetes e dos medios de transmisión, que fan aumentar as dimensións da acción.

   Ex: O conflito entre os dous países derivou nunha batalla sanguinolenta.

2. s f

   Discusión entre dúas partes para acadar un acordo.

   Ex: A batalla parlamentaria dura xa tres días.

3. s f [BÉL]

   Cada unha das partes en que se dividía un exército.

4. batalla aliñada

   En orde de batalla.

5. batalla a ultranza [HIST]

   Entre os costumes cabaleirescos, combate a morte entre dous adversarios. Estaba precedida polo libramento de carteis ou de letras de batalla (letra de batalla), celebrada en campo neutral e presidida por un xuíz imparcial. O combate estaba regulado por normas precisas, recollidas en tratados.

6. batalla campal [BÉL]

   Batalla entre dous exércitos dirimida nun terreo apto para manobrar a totalidade das tropas belixerantes.

7. batalla naval

   Combate naval.

8. cabalo de batalla

   Cabalo aguerrido.

9. campo de batalla

   Lugar onde se libra a batalla.

10. en batalla [HERÁLD]

    Figura posta unha en fronte da outra.

    Ex: As armas daquela liñaxe presentan dous leóns en batalla sobre campo de goles.

    Sinónimos: batallante.

Frases feitas

• Cabalo de batalla. O centro do conflito nunha discusión ou nun debate.

• De batalla. Aplícase ás pezas de vestir que se usan moi a miúdo.