batak

Relativo ou pertencente aos bataks ou á súa lingua.

Individuo do pobo batak.

Pobo protoindonesio de Sumatra. Os bataks, aproximadamente uns dous millóns de individuos, habitan principalmente na rexión do lago Toba. Divídense en diversas tribos, viven en clans exogámicos patrilineais. A súa cultura material, que se fundamenta nas súas actividades agrícolas e gandeiras, está relativamente desenvolvida. A súa cultura recibiu unha importante influencia hindú, malaia e xavanesa.

Lingua do grupo indonesio falada polos bataks. Comprende dous grupos principais: toba-batak e dairi ou subtoba, divididos en diversos dialectos. Para os ritos funerarios empregan unha linguaxe especial. O sistema de escritura, diferente en toba-batak e en daire, ten a súa orixe na India meridional.