Belém

Capital do estado de Pará (Brasil) situada entre o río Pará e o Belém, un dos brazos do Amazonas, chamada tamén Nossa Senhora de Belém do Pará ou Pará (1.144.312 h [1996]). É o principal núcleo industrial (estaleiros, serradoiros, cementeiras, industrias alimentarias, etc) e comercial do Brasil setentrional. Ademais, é un importante nó de comunicacións por terra (ferrocarril) e ten porto e aeroporto internacional. A cidade desenvolveuse ao redor do porto, fundado polos portugueses en 1616. A exportación do caucho impulsou o seu crecemento dende a segunda metade do s XIX. É sede da Universidade do Pará, onde se desenvolve unha importante investigación agropecuaria. Así mesmo, ten unha intensa actividade cultural.