Benedetti Farrugia, Mario

Poeta, narrador, dramaturgo, ensaísta e crítico. Compaxinou a creación literaria cunha ampla variedade de traballos de oficina. Entre 1938 e 1941 residiu case continuamente en Bos Aires. De volta a Montevideo (1945), colaborou en diversas publicacións periódicas, dirixiu a revista literaria Marginalia e codirixiu Número e, a partir de 1954, fíxose cargo da sección literaria de Marcha. Por motivos políticos abandonou o seu país en 1974 e viviu en Arxentina, Cuba, Perú e España. Entre a súa produción literaria destacan os poemarios Sólo mientras tanto (1950), Poemas de la oficina (1956), La casa y el ladrillo (1977), El olvido está lleno de memoria (1995); as novelas Quien de nosotros? (1953), La tregua (1960), Gracias por el fuego (1965), El cumpleaños de Juan Ángel (1971), Primavera con una esquina rota (1982), La borra del café (1992); os contos Esta mañana (1949), Montevideanos (1959), La muerte y otras sorpresas (1968), Con y sin nostalgia (1977), Cuentos completos (1986), Despistes y franquezas (1989) e Buzón de tiempo (1999); as pezas teatrais Ida y vuelta (1963), Pedro y el capitán (1979), versionada ao galego por Francisco Pillado Mayor e representada polo grupo de teatro de Amnistía Internacional da Coruña no Teatro Rosalía de Castro (1993); e os ensaios El país de la cola de paja (1960), El escritor latinoamericano y la revolución posible (1974) ou La realidad y la palabra (1991). Cómpre salientar a súa faceta, dende 1970, como autor de letras de cancións, interpretadas por Pablo Milanés, Soledad Bravo ou Joan Manuel Serrat, entre outros. Entre os discos producidos de maior repercusión destacan Nacha canta e Benedetti (1972) e El Sur también existe (1985). En 1999 recibiu o Premio Reina Sofía de Poesía.

Cronología