bivalvo -va

Que ten dúas valvas ou que se abre en dúas valvas, como as noces ou os mexillóns.

Molusco da clase dos bivalvos.

Clase de moluscos que teñen a cuncha constituída por dúas valvas, coa cabeza rudimentaria e o pé en forma de machada. O corpo, de simetría bilateral e comprimido lateralmente, está recuberto polo manto; este presenta dous lóbulos laterais, que delimitan unha cavidade paleal grande. Os extremos posteriores do manto adoitan formar sifóns inhalantes e exhalantes. As dúas valvas que forman a cuncha articúlanse dorsalmente por un ligamento elástico e unha bisagra. O pechamento das valvas prodúcese pola acción dun ou dous músculos adutores, pero a apertura ten lugar de maneira pasiva. Os bivalvos constitúen un grupo amplo, con máis de 8.000 especies de auga doce ou salgada en todo o mundo. Comprende as subclases dos protobranquios, lamelibranquios e anomalodésmatos.