Buio, serra de

Pequeno sistema montañoso do N da Comunidade Autónoma, que traza a fronteira entre os concellos de Viveiro, Xove e Cervo (comarca da Mariña Occidental), ao N e o concello do Valadouro (comarca da Mariña Central), ao S. Esténdese dende o pico do Pau da Vella, situado a 703 m de altitude no vértice das parroquias (e concellos) de Boimente (Viveiro), Monte (Xove), Rúa (Cervo), Vilacampa e A Laxe (O Valadouro). A súa liña de cumes segue unha dirección O-L que se prolonga ata o couto do Acibro, de 604 m de altitude. A partir de aí descende cara ao NL baixando ata altitudes inferiores aos 500 m. As súas máximas cotas, á parte das xa mencionadas, son o Chao de Gamoides (638 m) e o Alto do Lombo Gordo (596 m).