Buñuel, Luis

Realizador cinematográfico. Formouse na Universidad de Madrid, onde fundou un cine-club en 1920. Vinculado intelectualmente á Xeración do 27, instalouse en París, onde se preparou na Academia de Cine e realizou os seus dous primeiros filmes en colaboración con Salvador Dalí: Un chien andalou (Un can andaluz, 1928) e L’âge d’or (A idade de ouro, 1930), obra representativa do cine surrealista. Durante a Guerra Civil española supervisou filmes de propaganda política republicana como o documental Madrid 36. Durante o seu exilio nos EE UU (1939-1946) foi artisticamente pouco produtivo; a partir de 1955 iniciou unha prestixiosa carreira internacional con realizacións como Viridiana (1961), que gañou o gran premio do festival de Cannes, El ángel exterminador (1962), Belle de jour (Bela de día, 1966), Tristana (1970), Le charme discret de la bourgeoisie (O discreto encanto da burguesía, 1972) e Ese oscuro objeto del deseo (1978).

Cronología