buxa

1. s f [MÚS]

   Cada unha das pezas de madeira da gaita que van amarradas ao fol, onde se introducen os tubos sonoros. Dependendo do tipo de gaita poden ter entre tres e cinco buxas, que corresponden ao punteiro, ao roncón, á ronquilla, ao chillón e ao soprete.

2. s f [ETN]

   1. Peza de madeira onde vai encaixado o eixe do carro; para que o encaixe e o xiro sexa perfecto debe adoptar unha forma de rebaixe semicircular.

   2. Oco que deixan o coucillón e as dentoiras no que xira o eixe do carro.

3. s f [ETN]

   Peza cilíndrica, de ferro ou madeira e con saída estreita, pola que pasa a auga que pon en funcionamento o rodicio do muíño.

4. s f [ETN]

   Disco de madeira de buxo, colocado no centro da roda de afiar, que leva un burato polo que pasa o eixe ou manubrio que pon en movemento esta roda.

5. s f [ETN]

   Termo da xerga dos canteiros galegos que corresponde á voz ‘mestre’.

6. s f [ETN]

   Termo da xerga dos cesteiros de Mondariz que corresponde á voz ‘encargado’.

Frases feitas

• Ter a buxa frouxa. Dicir mentiras.