calembur

Figura literaria que consiste no reagrupamento das mesmas sílabas en distintas palabras, de forma que se produce un xogo de palabras de tal xeito que a secuencia en cuestión pode interpretarse de distintas maneiras. O recurso baséase na ambigüidade da fala, que permite distintas articulacións do material sonoro, dando lugar a diferentes unidades léxicas, fronte á fixación da lingua escrita, onde os elementos aparecen claramente segmentados. O seu carácter equívoco convérteo nun procedemento habitual nas adiviñas. Atópanse exemplos de calembur dende a literatura clásica, na obra de Plauto, Aristófanes ou Cicerón. Tamén é frecuente na poesía satírica do barroco castelán.