caléndula

Herba do xénero Calendula, da familia das asteráceas, de ata 60 cm de altura, que pode ser perenne ou anual. Presentan follas oblongas e alternas, flores en capítulos vistosos, solitarios, de cor variable entre amarela e laranxa, coas flores periféricas liguladas, e froitos en aquenio, sen vilano e de tres tipos nun mesmo capítulo: en forma de fouce, barco e anel. En Galicia están presentes as especies: C. arvensis, de capítulos de ata 3,5 cm de diámetro, propias de terras removidas e de cultivo; C. officinalis, de capítulos de ata 5 cm de diámetro de cor laranxa, cultivada ou subespontánea (os pétalos das flores desta planta empréganse para condimentar ensaladas); e C. suffruticosa, de capítulos amarelos ou laranxas de ata 3 cm de diámetro, en areais costeiros e rochedos.