cancereixo

Planta do xénero Sorbus, da familia das rosáceas, que pode presentar porte de arbusto ou de árbore, de ata 20 m de altura. De casca lisa e agrisada, sen espiñas e de folla caduca, presenta flores dispostas en corimbos de pétalos brancos de ata 10 mm de diámetro. En Galicia están presentes, formando parte dos bosques de montaña, as seguintes especies: S. aucuparia, con follas compostas, de ata 17 folíolos de marxe dentada, inflorescencias planas de ata 20 cm de diámetro, e froitos comestibles de cor alaranxada ou vermella; S. torminalis, de follas enteiras lobuladas de 3 a 8 parellas de nervios; e S. aria, tamén chamado   mostallo e que deu nome ao cume Mustallar, de follas enteiras coa marxe dentada e de 8 e 14 parellas de nervios laterais, tomentosas e abrancazadas no envés.