cartucho

1. 1. s m [BÉL]

      Envoltura cilíndrica de cartón, metal, plástico ou outro material que contén unha cantidade determinada de substancia explosiva.

   2. s m [BÉL]

      Conxunto inseparable de vaíña e bala empregado nas armas lixeiras e automáticas; na artillería coñécese como proxectil ou munición.

   3. s m

      Recipiente cilíndrico que contén tinta, empregado como recambio nalgunhas plumas estilográficas.

      Ex: Comprei un cartucho de tinta negra para a pluma que me regalaches.

   4. s m

      Elemento substituíble dalgunhas impresoras, faxes ou fotocopiadoras que contén o tóner ou as tintas necesarias para imprimir documentos en papel, transparencias, acetatos, etc. Algúns conteñen tamén outras partes que son susceptibles de desgaste, como o tambor electrofotográfico, e ao substituír o cartucho cámbianse unha gran cantidade de elementos internos da impresora láser.

   5. s m [IMAX]

      Envase compacto e opaco que aloxa unha cinta electromagnética capaz de gravar e reproducir textos, imaxes e sons.

   6. s m [TECNOL]

      Recipiente cilíndrico ou ovado, de diámetro comprendido xeralmente entre 25 e 52 mm e cunha lonxitude entre 75 e 210 mm, empregado para o transporte pneumático de pequenos materiais.

   7. s m [TECNOL]

      Elemento recambiable dun cortacircuítos de fusible que consiste nunha cuberta illadora cilíndrica ou prismática que ten no seu interior o fío ou elemento fusible; adoita estar cheo dun material illante (area, líquido, etc) que apaga o arco ao fundirse o fío. Ten dous contactos metálicos nos extremos que serven para fixar o cartucho ao soporte e establecer a conexión eléctrica.

   8. s m [INFORM]

      Parte interna extraíble dun ordenador, normalmente pequena e contida nunha caixa de plástico, que pode almacenar datos.

   9. cartucho filtrante [QUÍM]

      Envoltura cilíndrica pechada por unha base feita de celulosa purificada e empregada en traballos de laboratorio, especialmente en procesos de extracción. Colócase dentro do cartucho filtrante a substancia que se quere extraer, e este sométese ao paso reiterado de disolvente nun aparello extractor de Soxhlet.

2. 1. s m

      Bolsa feita de papel, xeralmente de forma cilíndrica, que serve para conter doces, froitas ou outros alimentos semellantes.

      Ex: Comeu un cartucho de castañas.

   2. s m

      Moedas dunha mesma clase ou cantidade envoltas cun anaco de papel.

      Ex: Foi ó banco buscar un cartucho de pesos.

3. s m [HIST/ARTE]

   Disco circular ou oval, recordo do disco solar, que envolvía o nome do faraón exipcio cunha escritura xeroglífica.

4. s m [HERÁLD]

   Elemento ornamental arquitectónico consistente nun marco esculpido con rizos e volutas, de forma xeralmente oval, que envolve un escudo.

5. cartucho de fontes

   Dispositivo adaptable a unha impresora láser ou a outros tipos determinados de impresoras que conteñen fontes adicionais en chips ROM.

Frases feitas

• Queimar o último/derradeiro cartucho. Intentar algunha cousa por última vez.