Casoio

Río afluente do Sil pola esquerda. Nace da confluencia, na parroquia de Casoio (concello de Carballeda de Valdeorras), de dous tributarios, o Valborrás e o Riodolas, que drenan respectivamente o macizo de Trevinca e a serra do Eixe. Cun curso de dirección SL-NO drena as parroquias de Lardeira, Riodolas, A Portela do Trigal, Casoio, Viladequinta, Robledo e Sobradelo (todas do concello de Carballeda de Valdeorras), onde queda represado polo encoro ao que lle dá nome, antes da súa desembocadura, logo dun percorrido duns 20 km. Verte ao Sil un caudal medio de 2,4 m³/s.