Censor, El

Semanario liberal publicado en Betanzos dende outubro de 1883 ata febreiro de 1884 e subtitulado “Periódico semanal de intereses materiales, noticias y anuncios”. Foi dirixido por Roque Ponte Peña ata 1884, ano no que foi substituído por Severo Ares. Na redacción figuraban Manuel M. Teixeiro, Justo Contás Illá e Manuel Vaamonde. Colaboraban o poeta Fernando García Acuña, Constantino Ares e o escritor Manuel M. Seoane Santiso, que publicou os primeiros capítulos da súa Historia de Betanzos. Incluía as seccións “Notas” e “Variedades”, e diversos artigos sobre música, teatro, literatura en castelán e poemas en galego. Máis exemplos de produción literaria son “Charada” e o apartado “Dimes y Diretes”, no que se critican ironicamente e mediante diálogos, comportamentos típicos da época. Do mesmo estilo é “Recortes”, onde se inclúen notas humorísticas.