"Baena" (Contén)

Xénero de cianofíceas da orde das nostocais que forman filamentos con heterocistes como os das cianofíceas do xénero Nostoc, pero de vida planctónica. Poden orixinar masas de cor verde na superficie da auga, que reciben o nome de flos aquae.

Denominación de Orixe que protexe un aceite de recoñecido prestixio que se elabora no sueste da provincia de Córdoba. É un aceite virxe de calidade extra, cunha acidez máxima dun grao, elaborado maioritariamente con olivas da variedade picuda. O aroma característico é desde afroitado intenso a doce suave e a cor é amarela, con tons de verdosos a dourados. A produción anual ronda as 9.000 toneladas.

Cancioneiro de Baena.

Colección de poesías compiladas por Juan Alfonso de Baena arredor de 1430, dedicada ao rei de Castela Xoán II e á súa muller María. O manuscrito conservado gárdase na Bibliothèque Nationale de París. Contén 576 composicións de 56 autores, agrupadas por xéneros. O cancioneiro recolle a produción poética da corte de Xoán II de Castela e presenta desde pezas de louvanza e de baixo ton ata producións de gran categoría poética; escasea o xénero amoroso e domina a poesía teolóxica, moral, ascética e política. Foi editado por Pedro José Pidal (1851), H. R. Lang (1926) e José M. Azáceta. Nun principio, de acordo co índice, contiña a obra de Alfonso Álvarez de Villasandino (con máis de 200 poemas), Francisco Imperial, Fr. Diego de Valencia, Fernán Sánchez de Talavera, Fernando Pérez de Guzmán, Fernán Manuel de Lando, Ruy Páez de Ribera, Pero Ferrús, Macías o Namorado, Arcediago de Toro, Pero Vélez de Guevara, Diego Martínez de Medina, Gonzalo Martínez de Medina, Pero González de...