Cid Fernández, Xosé Manuel

Pedagogo. Doutor en Pedagoxía pola Universidade de Santiago de Compostela, foi profesor no Colexio Universitario de Ourense (1979-1990) e, dende 1990, profesor de teoría e historia da educación na Universidade de Vigo. Foi director do Colexio Universitario de Ourense (1989-1990), vicedecano e decano da facultade de Humanidades e, dende 1998, vicerrector de Extensión Universitaria. En 1979 ingresou no Movemento Cooperativo da Escola Popular e, en 1983, contribuíu á fundación da Nova Escola Galega (NEG) baseada na pedagoxía de Célestin Freinet. Coordinou o suplemento pedagóxico “Na escola” (1988-1992) dos diarios La Región e Atlántico Diario, e promocionou as xornadas de educación para a paz (1985-1996), que intentou proxectar internacionalmente; unha síntese desta experiencia recóllese na obra Human Rights and values Education in Europe (Dereitos humanos e valores educativos en Europa). Dende a NEG promoveu a homenaxe aos mestres da ATEO, a Ferrer i Guàrdia, a Luís Taboada Camoeiras e a Freinet. Para celebrar os vinte e cinco anos de pedagoxía Freinet en Galicia, coordinou, con María D. Dapía, a obra Da escola rural á educación social. 25 anos de Freinet en Galicia (2000). Colaborador de revistas como Agália, Revista Galega de Educación, Historia de la Educación ou Bulletí de la Societat d’Historia de l’Educació dels Països de Llengua Catalana, entre as súas obras cómpre salientar Educación e ideoloxía en Ourense durante a II República (1989) e Escola, Democracia e República (1994). Ademais, coordinou, xunto con Agustín Requejo, a obra Educación e Sociedade en Ourense (1989).

Cronoloxía