coresma

Período de corenta días que, no ciclo do ano litúrxico cristián, precede á festa de Pascua. Ao principio tiña un carácter marcadamente bautismal. Á fin do s IV adoptou tamén un cariz penitencial, nun dobre sentido: era o tempo en que os penitentes públicos cumprían as penitencias necesarias para obter a reconciliación coa Igrexa, que se facía o Xoves Santo; e era a época en que todos os cristiáns practicaban o xaxún e a abstinencia. O tempo litúrxico da coresma tivo, ata comezos do s XX, unha gran significación popular. Na tradición oral recóllense ditos como: “A Coresma e a cadea para os pobres parecen feitas. Non se che fará a Coresma longa, se debes algo para a Pascoa. O sermón, o sábalo e o salmón, na Coresma teñen sazón, despois non”. OBS: Normalmente, escríbese en maiúscula.