costela

1. 1. s f [ANAT]

      Cada un dos ósos planos e arqueados que forman as paredes da cavidade torácica e que serven para protexer os órganos, coma os pulmóns e o corazón. No ser humano, o número de costelas é de doce pares. Están unidas, por detrás, á columna vertebral dorsal mediante as articulacións vertebrocostal e transversocostal e, por diante, ao esterno polas cartilaxes costais. As sete primeiras son verdadeiras, chamadas así porque se unen a cartilaxes que se articulan cada unha delas co esterno; as tres seguintes son falsas, porque a cartilaxe se une ao das costelas superiores; e as dúas últimas son flotantes, porque a cartilaxe é libre. Anatomicamente, presenta unha cabeza, extremidade engrosada que se articula coa vértebra; unha zona máis estreita chamada colo; unha tuberosidade en forma de prominencia que se articula coa apófise transversa das vértebras correspondentes; e un corpo, que é a parte aplanada da costela.

   2. costela moumiña

      Costela inferior e máis pequena do costeleiro.

2. s f

   Costela de certos animais coa carne pegada, que se toma como alimento.

   Ex: Arranxou unha pouca costela con patacas e chícharos.

3. s f

   1. Calquera peza con forma similar a unha costela do corpo.

      Ex: Rompéronselleme as dúas costelas ó abano, por iso agora avivo o lume cun cartón.

   2. Cada unha das tiras anchas de madeira coas que se elaboran cestos e utensilios semellantes.

      Sinónimos: costra, costrán.

   3. Cada unha das tiras que constitúen as canizas do carro.

   4. [AERON]

      Elemento estrutural das superficies de sustentación e de mando dunha aeronave, que fai de soporte do revestimento.

   5. [ARQUIT]

      Cada un dos listóns ou pezas horizontais que, nunha cimbra, unen os coitelos e lles serven de apoio ás doelas.

   6. [GRÁF]

      Tiras de cartolina que se poñen nos lombos dos libros antes de recubrilos de pel para encadernalos.

   7. [MAR]

      caderna.

4. s f

   Trapela para cazar paxaros.

5. s f [BIOL]

   Prominencia elevada e alongada que resalta na superficie dun órgano ou estrutura, como as que presentan moitos froitos de plantas da familia das apiáceas, algunhas follas e as cunchas dalgúns gasterópodos.

6. s f [ARTE]

   Decoración en forma de nervio dalgúns vidros romanos.

Frases feitas

• Abanearlle unha persoa as costelas a alguén. Bourar nunha persoa.

• Calcarlle/medirlle as costelas a alguén. Pegarlle con saña.

• Poder contarlle a alguén as costelas. Estar unha persoa extremadamente fraca.