Cotula

Xénero de herbáceas da familia das asteráceas, de capítulos hermafroditas, flores liguladas que presentan no involucro brácteas en dúas ringleiras e un receptáculo plano e sen escamas, e froitos en aquenio sen lanuxe. En Galicia están presentes as especies: C. coronopifolia, planta anual, reptante e ascendente, que acada os 15 cm de altura, glabra e aromática, de follas enteiras ou lixeiramente lobuladas dispostas de xeito alterno, con capítulos amarelos de 10 mm de diámetro, illados sobre un longo pedúnculo; e C. australis, planta pilosa e ramificada, de follas pinnatisectas divididas en segmentos lineares, capítulos de ata 5 mm de diámetro, de pedicelo curto e flores interiores abrancazadas. A primeira, orixinaria de Sudáfrica, é propia de zonas húmidas costeiras, as máis das veces salobres, e a segunda, orixinaria de Oceanía, está presente en ambientes ruderais do sudoeste do país galego.