Cotyledon

Xénero de subarbustos da familia das crasuláceas. De follas engrosadas dispostas de xeito alterno, presenta flores pendurantes e pentámeras cos pétalos soldados formando un tubo, dispostas nunha umbela no extremo da planta que dan lugar a froitos en folículo de sementes de forma elipsoide e estriada. É orixinario de Sudáfrica. En Galicia está presente a especie C. orbiculata como especie ornamental, de ata 100 cm de altura, follas de ata 14 cm de lonxitude e 6 cm de ancho, estreitas na base e de extremo arredondado cun pequeno mucrón e flores de cor vermella amarelenta.