Cova da Serpe, serra da

Sistema montañoso do sector central da Dorsal Occidental Galega, situado ao S do Cordal de Montouto, que lles serve de límite ás comarcas de Betanzos (concellos de Aranga e Curtis) e a Terra de Melide (concello de Sobrado) coas de Lugo (concello de Friol) e a Terra Chá (concello de Guitiriz). Érguese sobre unha banda de xistos e lousas do Ordovícico inferior, mesturada con ollo de sapo (megacristais de cuarzo e feldespato nunha matriz de micas de gran fino). A súa máxima cota son os 838 m de altitude do monte Cova, no límite entre as parroquias de Grixalba (concello de Sobrado), As Negradas (concello de Guitiriz) e Anafreita (concello de Friol).