culler

Utensilio de metal, madeira ou doutros materiais, xeralmente dunha soa peza, semellante a unha pequena pa coa folla cóncava e habitualmente con forma oval. Emprégase para coller unha porción do contido, especialmente líquido, dun recipiente e transportalo a outro recipiente ou para levalo á boca. Na tradición oral recóllense ditos como: “A culler chea quere a boca baleira. Coa culler que escollas terás que comer as sopas. Culleres, fainas o tempo. Quen mala culler colle, con mala culler come”.

Cantidade dunha substancia que colle nunha culler.

Utensilio ou peza que, pola súa forma ou función, se asemella a unha culler.

Cada unha das pas que compoñen o rodicio dun muíño.

Recipiente troncocónico ou cilíndrido de prancha recuberto de material refractario, que serve para transportar o material fundido do crisol aos moldes ou ao forno de tratamento ou de aliaxe.

Accesorio metálico en forma de recipiente cóncavo aberto, reforzado eventualmente cunhas pugas na parte frontal, empregado principalmente nas máquinas escavadoras e nas pas cargadoras para traballos de escavación e movemento de terras. A culler autoprensadora, que consta de dúas mandíbulas, utilízase para a carga e descarga de materiais granulosos, pulverulentos ou semifluídos.