dama

Muller que pertence á nobreza.

Muller que mostra boa educación e elegancia.

Tratamento de respecto que se lles dá ás mulleres.

Tipoloxía teatral que se utilizaba para diferenciar o papel das actrices nas compañías, en función do personaxe que tiñan que representar. Así, no teatro español do s XIX, a primeira dama desempeñaba os papeis importantes, mentres a segunda, a terceira e a cuarta tiñan asignados outros roles en función do tipo de espectáculo. Tamén se diferenciaba entre a dama inxenua, a dama nova, a dama de carácter, a dama de cantado e a dama de música.

Esposa dun presidente de república.

Peza que, no xogo de damas, se cobre con outra da mesma cor cando consegue chegar á primeira liña do contrario e que se pode mover en todas as direccións.

Xogo de habilidade practicado entre dúas persoas. O xogo realízase sobre un taboleiro de 64 cadros e 24 pezas, no xogo español, e nun de 100 cadros e 40 pezas no polaco. As pezas, unhas brancas e outras negras, póñense nos cadros negros. Os xogadores moven alternativamente as pezas en diagonal de cadro en cadro, sen poder retroceder. O xogo consiste en matar as pezas do contrario, cousa posible cando se ten unha peza diante doutra do contrario cun cadro baleiro detrás. Se unha peza consegue chegar a un cadro da última liña horizontal convértese en dama. A dama pode retroceder e moverse en diagonal saltando varios cadros e matando todas as pezas que atope nas súas diagonais.

Muller que servía e acompañaba a raíña e as princesas.

Muller que acompaña a elixida nun concurso de beleza, a raíña dunha festa ou a noiva na cerimonia do seu casamento.