Davos

Cidade do cantón de Graubünden, Suíza, situada ao SL de Chur (13.000 h [2001]). É a cidade de maior altitude de Europa con 2.844 m. A súa economía baséase principalmente no turismo e constitúe un importante centro de vacacións de montaña. Entre as principais actividades destaca a práctica de deportes de inverno. Nesta localidade celébrase o Foro Económico Mundial ou Foro de Davos, creado polo profesor Klaus Schwab en 1970 coa finalidade de reunir os líderes económicos europeos e incentivar a industria. Nestes encontros participan xefes de Estado e de goberno de todo o mundo, ministros, xefes de bancos centrais, empresarios e académicos, xunto co Fondo Monetario Internacional (FMI), o Banco Mundial e a Organización Mundial de Comercio (OMC).