Décimas do Mar

Imposto medieval indirecto sobre o tráfico de mercadorías que entraban ou saían polos portos de mar. Os seus antecedentes atópanse no tributo romano-visigodo denominado Portorium, e perviviu nos reinos que xurdiron no proceso de Reconquista baixo diversas formas. Nos reinos de León e Castela consistía nun gravame dun décimo do valor das mercadorías que pasaban polos seus portos. En Galicia constituíron un recurso ordinario do fisco rexio, pero dende a Plena Idade Media a facenda real repartiu estes ingresos cos donos dos grandes señoríos membros da alta aristocracia galega, como era o caso do arcebispo de Compostela que percibiu unha parte do imposto nas vilas marítimas do seu señorío.