dificultade

1. s f

   Calidade de difícil.

   Ex: Os escaladores subiron unha montaña dunha dificultade incrible.

2. s f

   1. Situación ou circunstancia que fai difícil ou obstaculiza a realización ou entendemento dunha cousa, e que é necesario resolver.

      Ex: A miña maior dificultade para o estudo é que teño problemas para concentrarme. Tivo moitas dificultades para chegar ata o cume.

      Sinónimos: impedimento.

   2. Reparo ou oposición que se impón para a realización dalgunha cousa.

      Ex: Puxéronlle moitas dificultades para darlle o visado.

      Sinónimos: impedimento.
3. dificultade escolar [EDUC]

   Dificultades que poden ter os cativos en idade escolar e que dalgunha maneira lles impiden a súa integración total na dinámica normal das clases. Estas poden ser de diversos tipos: físico, psíquico ou social.

Refráns

• A auga costa arriba corre pouco.
• A cada anaquiño hai unha legua de mal camiño.
• A cada día abóndalle a súa malicia.
• A derradeira medida sempre foi mala de encher.
• A día tolo, camiñante afouto/cordo.
• A mal ano, boa cara.
• A pan duro, dente agudo.
• A pedra redonda nunca moito acouga.
• A pouco vento, forza de remos.
• A torto ou dereito, axude Deus ao noso consello.
• Agulla en palleiro mala é de atopar.
• Andar, andar, que o rabo está por esfolar.
• Auga de moitos muíños é mala de arrecadar.
• Auga de moitos regueiros é mala de arrecadar.
• Bo traballo é ser servidor despois de ser señor.
• Cando Deus non quere, os santos non poden.
• Cando penses meter o dente en seguro, atoparás co duro.
• Cando vai torta, o demo que a endereite.
• Con tres pes abriraste camiño; pau, paciencia e padriño.
• Cortada a carrasca, calquera a leña apaña.
• Deus apreta mais non afoga.
• En todas partes cocen pan.
• Mar de andazo, non che faltará argazo.
• Neste mundo mesquiño cando baixa o pan sobe o viño.
• Non hai pedra, por dura que sexa, que non amoleza.
• Non hai peor dificultade cá pouca vontade.
• Non hai río bravo que non teña un bo paso para atravesalo.
• Non se vai ao ceo a cabalo.
• Non sempre vai a auga ao rego.
• O aire que corre, muda o catavento mais non a torre.
• O mal camiño, andalo logo.
• Ó mal vento vólvelle o capelo.
• O palleiro vello, cando se acende, malo é de apagar.
• O que come as duras mellor comerá as maduras.
• O que roe as duras, ben pode roer as maduras.
• Onde non chove, barruza.
• Ou parir ou rebentar, non hai outro camiño por onde botar.
• Para o bo día abre a porta e para o malo entórnaa.
• Por medo aos gorrións non quedan sen sementar os leiróns.
• Quen pasou o máis, que pase o menos.
• Se te vires perdido, bótate a nadar.
• ¿Como che vai, Sindo? -As veces rabiando e ás veces rindo.