Djenné

Cidade de Mali, na rexión administrativa de Mopti, no delta do río Níxer. As principais actividades económicas están relacionadas coas funcións administrativas. Tamén destaca unha pequena industria artesanal dedicada á elaboración de cerámica. Fundada no s IX, converteuse no s XV nun importante enclave comercial das rutas que unían o norte e o sur da rexión. Do seu patrimonio cultural destacan as vivendas tradicionais, construídas en adobe, decoradas con motivos árabes e situadas no alto dos outeiros; e a gran mesquita, feita en barro a principios do s XX, que substituíu a que existía dende o s XI. A UNESCO declarouna Patrimonio da Humanidade en 1988.