émbolo

Peza de certas máquinas, de forma cilíndrica, que se pode accionar cun movemento alternativo no interior dun cilindro. O émbolo vai unido a unha barra ou a un mecanismo de biela-manivela, que se move solidariamente con este e que serve para transmitir o movemento. Nas máquinas motrices (motor de combustión interna, máquina de vapor, etc), a forza que lle comunica o movemento ao émbolo está producida pola presión dun fluído. Nas máquinas de impulsión (bomba hidráulica), o émbolo serve para transmitir a un fluído a enerxía producida por unha máquina motriz. Os émbolos tamén se utilizan nos dispositivos que transforman a presión existente nun circuíto pneumático ou hidráulico nunha forza mecánica. O émbolo pode ser de efecto simple, cando o traballo se fai por unha soa cara, ou de efecto dobre, cando se fai sobre as dúas.

Órgano do motor rotativo ou motor Wankel formado por tres lóbulos, que xira con movemento planetario, impulsado pola forza de expansión do combustible en ignición.