Ero

Antropónimo masculino, frecuente na Idade Media, procedente do xermánico hairu ‘espada’. Posiblemente influíu na súa difusión a confluencia co nome Eros, procedente do grego ἕ ρως ‘desexo, amor, paixón’, a través do latín Erōs, divindade que personifica o amor. Santo Ero da Armenteira (s XI) foi o abade e mítico fundador do mosteiro de Armenteira. A súa lenda recóllese nas Cantigas de Santa María de Afonso X o Sabio. A súa festividade celébrase o 30 de agosto.