escala

Serie graduada ascendente ou descendente con relación a unha calidade ou aspecto común.

Sucesión de sons dispostos segundo un modo ou sistema determinado. As escalas diferéncianse pola distribución das distancias entre as notas e pola súa altura inicial. No s XI, Guido d’Arezzo deulle nome a cada unha das notas do hexacordio: ut, re, mi, fa, sol, la, sílabas iniciais de cada hemistiquio da primeira estrofa do himno a san Xoán Bautista. Máis tarde agregouse un sétimo grao, denominado si. A sílaba ut, difícil de cantar, cambiouse no s XVII pola sílaba do. Nos países xermánicos e anglosaxóns empréganse letras do alfabeto. O sistema musical europeo aparecido na Idade Moderna baséase en dous tipos de escala: a diatónica e a cromática. A primeira, denominada tamén escala natural, dispón as sete notas en cinco tons e dous semitóns de intervalos. Segundo a distribución destes entre as notas, a escala será de modo maior ou menor. A escala cromática divídese en doce notas e está formada por semitóns. Hai outros tipos de escala como, por exemplo, a pentatónica (cinco sons no ámbito dunha oitava).

Gama dos grises dunha imaxe medidos por un escáner fotográfico.

Película positivada cunha serie de aumentos de densidade dende a transparente á opaca, coa que se avalía a exposición necesaria para o positivado.

Cada unha das series de penas ordenadas nos códigos de maior a menor gravidade, para adaptarse á índole, aos graos e ás circunstancias dos delitos e da participación dos culpables.

Sistema de valoración numérica utilizado na técnica de cuantificar a aceptación nutritiva dun alimento, xeralmente a través do sabor. Comprende dende o valor 9, que significa ‘agrada extraordinariamente’, ata o 1 ou ‘desagrada extraordinariamente’, pasando polo valor medio 5 que indica ‘non agrada nin desagrada’.

Liña graduada dividida en partes iguais ou desiguais, empregada para medir calquera cousa.

Escala de temperatura na que a orixe, o cero absoluto, representa a temperatura á que a presión dun gas ideal é nula, polo que non pode haber valores negativos. Hai dúas escalas absolutas de temperatura que son a Kelvin e a Rankine.

Escala de distancias de números ou símbolos que aparece sinalado no obxectivo para saber a distancia á que se está enfocando.

Instrumento para medir o nivel das augas do mar, construído cunha madeira vertical dividida en centímetros e decímetros.

Escala graduada do 1 ao 10 que se utiliza para medir a intensidade dos movementos sísmicos.

Relación entre a temperatura e a magnitude termométrica utilizada. As máis importantes son a de Celsius, a Fahrenheit, a Kelvin e a Rankine.

Parte do persoal profesional dun exército, arma ou corpo que, polo seu contido e procedencia, constitúe un conxunto especial e diferenciado, agrupado en función da súa antigüidade.

Clasificación dos funcionarios dunha corporación segundo o lugar de traballo, a antigüidade ou os méritos, entre outros factores. Comporta diferencias en canto á autoridade e aos emolumentos.

Serie de persoas ou estamentos que forman a sociedade, graduada segundo as súas categorías.

Lugar en que para unha nave para efectuar un embarque ou desembarque de persoas ou mercadorías entre o punto de orixe e o de destino.

Parada que realiza calquera nave de transporte entre o punto de orixe e o de destino para cargar ou descargar pasaxeiros ou mercadoría.