fábrica

1. Fábrica de lenzos tinguidos e prensados fundada en Mondoñedo por Luís López Lombardía por orde dunha Real Cédula do 27 de setembro de 1738. A concesión fíxose en principio por dez anos, coa condición, entre outras, de fabricar 54.000 pezas de todas as cores, de quince varas de longo e unha de ancho, de igual calidade ca as fabricadas polo gremio de mercería, especiería e droguería de Madrid, e coa obriga de vendelas por fardos ou pezas a 4 reais a vara e as vermellas a 70 reais a peza. Instalada nun amplo edificio construído no barrio de San Lázaro, converteuse nun centro abastecedor de considerable importancia. Non obstante , a escaseza de lenzo ocasionou o seu peche a finais do s XVIII. O edificio aproveitouno o episcopado para establecer un obradoiro co fin de proporcionar traballo a prostitutas.

2. s f

   Instalación ou conxunto de instalacións industriais, destinada á transformación de materias primas ou á produción de obxectos a partir de elementos máis simples.

3. [CONSTR]
   1. s f

      Construción ou obra feita con pedra ou ladrillo e argamasa.

   2. punto de fábrica

      Anaco de muro que se refai polo pé deixando o resto intacto.

4. [RELIX]
   1. s f

      Conxunto dos fondos que hai nunha igrexa, destinados á súa conservación e reparación, así como a satisfacer os custos do culto.

   2. consello de fábrica

      Persoas que administran os bens dunha igrexa.

5. s f [XEOL]

   Aparencia dunha rocha, determinada pola forma, o tamaño, e a disposición dos elementos, tanto minerais como partículas non cristalinas, que a constitúen; comprende a súa textura e a súa estrutura.

6. s f

   Aquilo que produce ou orixina algo.

   Ex: Era unha fábrica de facer cartos.

Frases feitas

• De fábrica 1 Que está feito con pedra, ladrillos ou argamasa.

• 2 Que vén establecido ou sae así directamente de fábrica. Ex: Defecto de fábrica. Marca de fábrica. Prezo de fábrica.