Faladoira, serra da

Sistema montañoso do extremo setentrional da Comunidade Autónoma de Galicia, que se estende entre os concellos de Mañón (parroquia das Grañas do Sor) e As Pontes de García Rodríguez (parroquias do Freixo, Somede e As Pontes de García Rodríguez). Comprendida entre a serra da Coriscada, ao N, e a depresión das Pontes, forma parte da Dorsal Occidental Galega. Cunha liña de cumes que apenas supera os 700 m, o seu teito son os 752 m do alto do Caxado.