Fundão

Cidade do distrito de Castelo Branco, Portugal (31.482 h [2001]). Está situada na Beira Baixa, ao N da serra da Guardunha, nunha área agrícola produtora de vide e aceite. Núcleo urbano desde a Idade Media, entre os ss XV e XVIII foi moi próspera como consecuencia do desenvolvemento da industria dos panos de la, potenciado polo establecemento de numerosas familias xudías de orixe española. No s XVIII o marqués de Pombal fundou nesta vila a Fabrica Real de panos de la. Do seu patrimonio cultural destacan a capela do Espírito Santo (1578), a igrexa Matriz barroca, a casa dos Maias, o solar dos Tudela e a casa dos Cunha (s XVIII).