Galicia

Publicación editada a partir de xuño de 1926. Subtitulouse “Revista del Centro Gallego de Buenos Aires” e foi a substituta do Boletín oficial del Centro Gallego. Dirixírona Luís Seoane (1940-1957), Eduardo Blanco Amor (1957-1965), Xosé Blanco Amor (1967-1970), Xoán Barreiro (1970-1971), Valentín Fernández (1971-1976), Xoán M. Pérez (1976-1978), Alfredo Baltar (1978-1981) e Rodolfo Alonso (1981). A través dos seus ensaios, artigos e documentos tentou servir como elemento difusor da cultura galega e como medio informativo das actividades dos emigrantes na Arxentina. A partir de 1932 abundaron as referencias ao nacionalismo e ao proxecto do Estatuto de Autonomía, así como novidades do Seminario de Estudos Galegos e da Real Academia Galega. A partir de 1979 subliñou a importancia para Galicia da aprobación do devandito Estatuto e ofreceu información sobre as actividades do Instituto Argentino de Cultura Gallega. Incluíu ademais poemas e contos dos principais escritores e intelectuais galegos, recensións das novidades editoriais galegas, necrolóxicas de escritores, bibliografías, homenaxes, centenarios e actos culturais.