gloria

1. Antropónimo feminino procedente do latín gloria ‘gloria’, ‘reputación, sona’. Na maioría dos casos é un nome cristián, tomado da palabra inicial do himno litúrxico de glorificación a Deus e á Trindade, “Gloria in excelsis Deo”, ou da fórmula de loubanza á Trindade na misa “Gloria Patri et Filio et Spiritui Sancto”. Seguindo a tendencia cristiá, iniciada xa en tempos do Imperio Romano, de darlles un novo contido ás ideas abstractas, Gloria pasa de ser unha divindidade, asociada a Honor, a converterse en nome persoal feminino. Non obstante , tamén pode tratarse dun nome laico medieval, de carácter augural, aínda existente no latín do Baixo Imperio, que se lle daba á filla para vaticinarlle a gloria, a fama e o honor. A súa festividade celébrase o 25 de marzo.

2. s f

   1. Grande honor, admiración ou fama que alcanza algúen polos seus méritos. Na tradición oral recóllense ditos como: “Coas glorias fóronse as memorias. Nos días de gloria esquécese a memoria. Gloria sen diñeiro é fume de palla”.

      Ex: Acadou a gloria cos seus triunfos deportivos.

   2. Feito ou acción que é motivo de orgullo, fama ou admiración.

      Ex: O poema relata as glorias daqueles antigos guerreiros.

   3. Persoa que é motivo de orgullo ou admiración.

      Ex: Estaba considerada unha gloria nacional.

3. s f

   Esplendor ou magnificencia.

4. s f

   Cousa que produce gran placer ou satisfacción.

5. s f [RELIX]

   Termo bíblico que expresa a loanza de Deus.

6. s f [PINT]

   1. Representación, nunha cúpula ou bóveda, do ceo cheo de anxos.

   2. Auréola con que se rodea algo nunha pintura ou representación.

7. s f [CONSTR]

   Sistema de calefacción baseado nunhas galerías ou tubos de barro cocido situados baixo unha plataforma elevada sobre o chan, por onde pasa aire quente. Deriva dos baños romanos e árabes e emprégase nas casas rurais.

8. s f [ALIM]

   Licor elaborado con mosto e augardente, propio da vila cacereña de Guijo de Santa Bárbara.

9. s f [ALIM]

   Pastel de follado recheo de crema ou doutro doce.

10. s m [MÚS/RELIX]

    Cántico da misa que comeza co verso “Gloria in excelsis Deo”.

Refráns

• Gloria sen diñeiro é fume de palla.
• Nos días de gloria esquécese a memoria.