Gloucester

Capital do condado de Gloucestershire, Inglaterra, Reino Unido, situada na beira esquerda do Severn, ao O dos Cotswolds (104.700 h [1994]). Cidade industrial, ten factorías de vagóns e material ferroviario, maquinaria agrícola, mobles e construción naval. Tamén destacan as capturas de salmónidos no Severn. Fundada polos romanos co nome de Glevum, a cidade desenvolveuse durante a Idade Media grazas ao comercio da la. Do seu patrimonio cultural destacan os restos romanos, a catedral normanda (ss XI-XV) e os peiraos de época vitoriana.