Heine, Heinrich

Poeta alemán. Estudiou dereito en Bonn, onde A. W. Schlegel o iniciou no romanticismo, Göttingen e Berlín, cidade na que recibiu a influencia de Hegel. Dos primeiros anos son Briefe aus Berlin (Cartas desde Berlín, 1821), Lyrisches Intermezzo (1823) e Reisebilder (Retratos de viaxes, 1827-1830), onde criticaba a sociedade, a política e a literatura do seu tempo. Publicou Das Buch der Lieder (O libro das cancións, 1827) e en 1831 estableceuse en París, desde onde informaba a Alemaña dos asuntos franceses: Französische Zustände (A situación en Francia), escribía artigos no Augsburger Allgemeine Zeitung, e divulgaba en Francia a filosofía alemá a través do Die romantische Schule (A escola romántica, 1833 en francés, 1836 en alemán) e de Zur Geschichte der Religion und Philosophie in Deutschland (Sobre a historia da relixión e a filosofía en Alemaña, 1834, en francés). En 1835 converteuse nun autor prohibido no seu país por liberal. En 1842 publicou os poemas políticos e sociais de Neue Gedichte (Novos poemas), e dúas viaxes a Alemaña motivaron as sátiras políticas Atta Troll (1843) e Deutschland, ein Wintermärche (Alemaña, un conto de inverno, 1844). Enfermo, en 1851 escribiu os poemas de Romanzero, dun gran lirismo. Traducido ao castelán por Eulogio Florentino Sanz, foi un dos autores románticos que máis influíu na obra poética de Rosalía de Castro, especialmente en Follas novas (1880) e en Las orrillas del Sar (1884).

Cronoloxía