lavacán

Nome que reciben dúas especies de algas do xénero Ulva, U. rigida e U. lactuca, da familia das ulváceas. Son algas laminares de cor verde escura, consistentes e cos bordos ondulados. Atópanse nos niveis intermareal ou infralitoral, adheridas ás rochas ou como epífitas doutras algas. Atópanse en augas ricas en materia orgánica, polo que se empregan como indicadores de contaminación, ou preto da costa. Ricas en vitaminas, son comestibles, pero empréganse máis como abono para a terra. A principal diferenza entre as dúas especies é que a U. rigida presenta uns pequenos dentes nos bordos que non aparecen na especie U. lactuca. OBS: Tamén se denomina leituga de mar.