Lopo/Lupa

Antropónimo que procede do cognome latino Lupus ‘lobo’. Na súa orixe tentábase vincular o nome a animais que tiñan unhas calidades cobizadas polo home; neste caso Adolfo, Rodolfo, Ansulfo, Andulfo, Lopo e Lupa auguran a quen leva este nome as calidades positivas que ten o lobo, como a fereza. Este nome sobreviviu convertido en apelido, aínda que é moito máis frecuente o seu derivado López. Presenta a variante masculina Lupo. Levaron este nome os bispos san Lopo de Troyes (s IV-s V), celebrado o 29 de xullo, e san Lopo de Sens (s VI-s VII), celebrado o 25 de setembro. De raizame lendaria é a historia da raíña Lupa, vinculada á traslatio do corpo do Apóstolo Santiago a Compostela.