manteiga

Produto graxo, sólido e homoxéneo, que se obtén ao bater e amasar, con ou sen modificación biolóxica, o leite ou a súa crema. Ten que ter un mínimo dun 80% de graxa e un máximo dun 16% de auga. A crema (ou nata) pode ser ácida ou doce. A batida, que ten lugar nas mantegueiras, permite romper os glóbulos de graxa da crema, que se solidifica formando dúas capas, unha sólida (graxa) e unha líquida (soro). Unha vez aglomerados os grumos de graxa, elimínase o soro e faise un lavado controlado con auga para que non perda aroma, a graxa maláxase para homoxenizala, e despois moldéase e acondiciónase. Tamén convén someter o leite ou a crema a un proceso de maduración por inoculación de cultivos de bacterias lácticas que forman diversos integrantes do aroma da manteiga. Engádense colorantes e antioxidantes, consérvase a baixa temperatura, envásase ou esterilízase. A manteiga é un alimento rico en calorías e vitamina A, e cunha certa cantidade de vitamina D.

Substancia que se obtén ao callar o aceite que se saca da graxa animal, sobre todo da dos porcos.

Nome que recibían antigamente distintas substancias análogas, pola súa consistencia, á manteiga. Destacan a manteiga de antimonio (SbCl 3 ), a manteiga de estano (SnO hidratado) e a manteiga de zinc (ZnCl 2 ).