mesa

Escoitar
mesa
Estela de Mesa ou pedra de Moab, s XI a C (Musée du Louvre)

(< lat mensa)

    1. s f

      Moble que consiste nunha peza lisa e plana sostida horizontalmente por patas ou pés, que se utiliza para comer, escribir, traballar ou xogar. A mesa seguiu as normas dos estilos decorativos e as súas evolucións. En Exipto sostíñase por patas que imitaban as dun animal. No mundo grecorromano eran de mármore ou bronce e sostíñanse mediante pés entrelazados. No Baixo Imperio Romano e en Bizancio construíanse mesas de metais preciosos. Durante a Idade Media consistía nunha gran peza de madeira sostida por pés moi simples no románico, que se complicaron no gótico. O Renacemento adoptou as formas romanas con patas laterais unidas por travesas con arcadas. O Barroco continuou coas travesas que unían pés en forma de columna salomónica ou de forma de estípite. O s XVIII rexeitou as travesas e simplificou as mesas. O estilo Imperio impuxo as redondas, que tamén se difundiron no s XIX. A partir do s XX a mesa seguíu as directrices do deseño industrial.
    2. mesa de levante

      Mesa que se pode facer máis longa, estendéndoa polos seus extremos.
  2. s f

    Moble preparado co necesario para comer sobre el.

    Ex: Ide para o comedor que xa está posta a mesa.
  3. s f

    Comida que se lle serve a alguén.

    Ex: Están afeitos á boa mesa.
  4. s f

    Banco longo que xeralmente non ten respaldo.
  5. s f [PREHIST]

    Monumento prehistórico da cultura talaiótica exclusivo de Menorca, que consta dunha pilastra monolítica de sección rectangular moi alongada, que fai de apoio a unha gran lousa plana, rectangular, colocada en posición horizontal. Están rodeadas por un recinto, case sempre en forma de ferradura. As interpretacións funcionais consideráronas como un elemento construtivo e as relixiosas como un monumento sagrado.
  6. s f

    Moble e lugar onde o carniceiro cortaba e vendía a carne.
  7. [XOGO]
    1. s f

      Maneira de xogar ao billar que consiste en tocar a bola nunha das bandas da mesa.
    2. mesa de billar

      Táboa grande, cuadrangular, provista de bandas elásticas, recuberta cun feltro verde ben tirante, sobre a que se fan correr as bólas do xogo do billar golpeándoas cos tacos.
    3. mesa de pimpón

      Mesa de forma rectangular e medidas regulamentarias (2,74 m de longo, 1,525 m de largo e 0,76 m de alto) que ten unha rede divisoria no medio de 15,25 cm de alto, e sobre a que se xoga ao pimpón.
  8. s f [XEOG]

    Recheo estrutural formado por un estrato horizontal illado, de superficie plana e beiras abruptas, moi resistente á erosión.
  9. s f

    Pequeno monte de terra entre dous sucos.
  10. s f [RELIX]

    Táboa do altar enriba da que se celebra a misa.
  11. s f [POLÍT]

    1. Conxunto de persoas, presidencia, vicepresidencia e secretariado, que dirixen un parlamento ou corporación.

    2. Asociación que se forma para reivindicar uns obxectivos comúns.
  12. s f [DER]

    Conxunto de bens ou rendas que ten unha persoa ou corporación eclesiástica.
  13. s f

    Plano horizontal dun chanzo.
  14. s f

    Estendido do carbón cocido cando se desfai a morea.
  15. mesa de cabeceira/de noite

    Moble pequeno, xeralmente con caixóns, que se coloca ao lado da cabeceira da cama para os servizos necesarios.
  16. mesa de cambio [HIST/ECON]

    Lugar onde os cambiadores poñían as moedas e facían o cambio manual dunhas moedas por outras. Había cambiadores ambulantes, que compraban e vendían, sobre todo nas feiras, onde poñían a mesa -negocio que perdurou ata o s XVIII-, e desde o s XIII, cambiadores sedentarios, establecidos nas cidades, que ademais facían outras operacións, hoxe consideradas bancarias. Durante a segunda metade do s XIII os cambiadores investiron os cartos que tiñan en depósito en operacións comerciais, que ás veces foron mal e os fixeron insolventes. Isto, entre outras reaccións puramente de mercado, provocou a intervención do poder público para protexer os clientes daquelas mesas. As dificultades motivaron, na segunda metade do s XIV, un crecente intervencionismo das cidades na banca, que deu lugar ao nacemento das mesas de cambio municipais.
  17. mesa de contratación [DER]

    Organismo que, nas adxudicacións de determinados contratos de obras, decide sobre as diferentes opcións.
  18. mesa de operacións [MED]

    Mesa metálica que é fácil de esterilizar e articular e que se usa en cirurxía para colocar o paciente no acto operatorio.
  19. mesa do rodicio

    Trabe de madeira horizontal que sostén o sistema mecánico do rodicio. OBS: Tamén se denomina raira.
  20. mesa electoral [DER/POLÍT]

    Órgano da administración electoral que se encarga de presidir a votación e levar a cabo o escrutinio.
  21. mesa petitoria

    Mesa instalada nalgún lugar para solicitar donativos para algún fin benéfico ou para recoller sinaturas.
  22. mesa redonda

    1. Mesa na que non hai un lugar de preferencia para ningún dos comensais.

    2. Mesa, nun hotel ou restaurante, na que se sentan todos os hóspedes mesturados.

    3. Grupo de persoas versadas nunha materia, que se reúnen para debater sobre un tema, e que teñen un moderador.
  23. mesa submarina [XEOG/BIOL]

    Relanzo illado, de superficie plana e orixe volcánica, que se atopa entre os 1.000 e 2.000 m de profundidade.

Palabras veciñas

Merz, Mario | Merza | mes | mesa | Mesa | Mesa | Meša