Nelson, Horatio

Almirante británico. A súa carreira naval comezou en 1793 durante a guerra contra Francia. Almirante en 1798, foi destinado a bloquear a frota francesa en Toulon. Unha tempestade desfixo os seus barcos e Napoleón I Bonaparte puido desembarcar un exército en Exipto. Refeita a escuadra, Nelson sorprendeu e destruíu a francesa en Abū Qīr (1.8.1798). En 1800 recibiu o mando dunha frota que se uniu á do almirante Parker para combater a coalición entre Dinamarca, Suecia, Rusia e Prusia coñecida como a neutralidade armada. Atacou e destruíu a frota danesa en Copenhaguen (abril de 1801) e a coalición desfíxose inmediatamente. En 1803 converteuse en almirante da frota inglesa no Mar Mediterráneo, no momento en que Napoleón preparaba a invasión das Illas Británicas. Ao comezo de 1805 a escuadra francesa de Toulon uniuse á española e navegou ata as Antillas coa intención de afastar a frota inglesa de Europa. A pesar disto, a frota combinada volveu cedo e refuxiouse en Cádiz, onde foi asaltada por Nelson. O 21 de outubro de 1805 saíu rapidamente e a escuadra inglesa destruíuna na Batalla de Trafalgar. Ferido durante o combate, Nelson morreu na ponte do seu barco.

Cronoloxía