Neuchâtel

Cantón situado ao O de Suíza (803 km²; 168.000 h [2000]). A súa capital é Neuchâtel (31.600 h [2001]). Esténdese sobre a vertente oriental do Jura ata o lago homónimo. A estreita franxa que bordea o lago é o sector máis poboado e máis próspero, ao tempo que o clima, máis moderado, permite o cultivo de vide e árbores froiteiras. Desde o s XVIII desenvolveuse unha industria especializada no estampado de teas e reloxaría. Tamén destacan a de maquinaria de precisión, a papeleira e a de madeira.