² nova

Estrela cunha luminosidade que aumenta bruscamente e que volve máis tarde, pouco a pouco, á situación inicial. En xeral, a luminosidade aparente que presenta a estrela na fase de prenova é moi exigua e a estrela non é visible a simple vista, polo que se pensaba antigamente que as novas eran verdadeiramente estrelas novas. O aumento da luminosidade absoluta dunha nova ten lugar en poucas horas, ou, como máximo, en poucos días, pero un momento antes do máximo, a luminosidade comeza a minguar. Obsérvase que as novas pouco luminosas son recorrentes, é dicir, que unha mesma estrela presenta periodicamente aumento da luminosidade. Nun principio críase que o fenómeno polo que unha estrela se transforma en nova era unha liberación moi rápida de enerxía, unha explosión no seu seo, pero os novos estudos postulan que é unha estrela binaria, formada por unha estrela grande, relativamente fría, e unha estrela anana branca dunha elevada temperatura superficial. Cando esta temperatura alcanza un valor duns 30 millóns de graos, comézanse a producir reaccións nucleares que transforman o hidróxeno en xeo seguindo o ciclo de Bethe, feito que libera unha gran cantidade de enerxía.