Pallares, condado de

Título concedido en 1816 por Fernando VII a Manuel Xosé de Pallares e Correa e Gayoso e Somoza , señor da casa-torre de Outeiro, rexedor perpetuo de Lugo e cabaleiro da orde de Carlos III. O primeiro conde de Pallares morreu sen descendencia e o título pasou a Manuel de Taboada e Pallares , II conde de Pallares. Este deixoulle o condado a Manuel Vázquez de Parga e Somoza e Pallares (Vilalba 1828-Madrid 1908), político e xurista, que foi deputado e senador vitalicio a partir de 1877. O IV conde de Pallares foi Manuel Ramón Vázquez de Parga e de la Riva e Somoza (Lugo 1862-?), quen recibiu o título en 1902. Luis Vázquez de Parga y Iglesias , de orixe madrileña, foi o V conde de Pallares. Catedrático e escritor, foi doutor en Filosofía e Letras, membro da Real Academia de la Historia e director en funcións do Museo Arqueológico Nacional (1966). O VI conde de Pallares foi Luis Vázquez de Parga y Gutiérrez del Arroyo , a quen lle concederon a rehabilitación do título en 2004.