Pedro de Mezonzo, san

(Curtis 930? - Santiago de Compostela 1003?) Relixioso. De nome Pedro Martínez Exioniz, foi abade dos mosteiros de Santa María de Mezonzo, Santa María de Sobrado dos Monxes (955) e San Paio de Antealtares (974). Confidente de san Rosendo, foi bispo de Iria (985-1003?). En 997 refuxiouse no Tambre cando os musulmáns arrasaron Santiago de Compostela e mandou evacuar da cidade as reliquias do Apóstolo Santiago, entre outros bens de valor. Impulsou a reconstrución material e espiritual da cidade tras a marcha de Almanzor e puido ser o autor de Salve Regina. A súa festividade celébrase o 10 de setembro.