pentastómido -da

Relativo ou pertencente aos pentastómidos.

Metazoo do grupo dos pentastómidos.

Grupo taxonómico de posición filoxenética incerta formado por animais metazoos tripoblásticos, celomados e protóstomos, con características intermedias entre os artrópodos e os anélidos. Inclúe especies parasitas das vías respiratorias de vertebrados carnívoros. O corpo, de 2 a 13 cm, é aplanado e anelado exteriormente, e divídese en tres rexións: a cefálica, curta, con cinco protuberancias, catro delas semellan patas con pinzas e uñas, e a quinta, en forma de morro, onde ten a boca; unha rexión xenital anelada que ocupa case todo o corpo; e unha rexión anal moi curta. Todo o corpo está cuberto dunha cutícula que muda periodicamente.