Peña Guitián, José

Pediatra. Catedrático de Pediatría da Universidade de Santiago de Compostela e xefe do departamento de Pediatría e Puericultura do Hospital Xeral de Galicia, formouse cos profesores M. Suárez en España, M. Lust en Bruxelas, H. Hungerland en Giessen e M. Debre en París. Dentro do seu labor de investigación destaca a tipificación dun tipo de displasia denominada condrodisplasia metafisaria tipo Peña. Escribiu numerosos artigos para diversas publicacións, como Anales de Pediatría e Acta Pediátrica Española, dirixiu diversos traballos de investigación e colaborou co artigo “Le trataiment de la meningite tuberculose dans Clinique Universitaire de Saint-Jaques de Compostelle” na obra Les Antibiotiques dans l’enface (1952). É tamén autor dos artigos “Las Mucopolisacaridosis: un nuevo capítulo de la patología humana” (1966), “Enfermedad de Morquio y eliminación urinaria del queratrosulfato” (1966) e “Algunos estudios en la displasia ectodérmica congénita” (1966) e do libro El problema de los retrasos del crecimiento (1984), en colaboración con Manuel Pombo. Membro da Real Academia de Medicina e Cirurxía de Galicia, foi elixido presidente do consello editorial da Revista Española de Pediatría e da Federación de Asociaciones de Médicos Especialistas Españoles, e presidente de honra da Sociedad de Pediatría de Galicia. Recibiu a Medalla Castelao (1993) e a medalla de prata da Consellería de Sanidade (2003).

Cronoloxía